غاز الريشة واحلام مواطن .. "بالعامية اسهل"
تخيل يا رعاك الله
انك تمتلك قطعة ارض منذ سنوات طويلة واليوم برن عليك شخص وبحكيلك الارض اللي عندك اللي كان سعرها "ملاليم" صار حقها "ملايين" .
بالضرورة رح تبلش تحلم شو بدك تعمل مشاريع وشو بدك تشتري الخ ..
وبنفس الطريقة لما الحكومة اعلنت عن وجود كميات كبيرة من الغاز في حقل الريشة، اكيد رح نبلش نحلم كيف ممكن نعمل مشاريع ونتطور كشعب "طفران عايف حاله". "طبعا مع التأكيد على ان احلام الحكومة ممكن ان لا تتطابق مع احلام المواطن او يمكن المواطن مش معزوم اصلا".
وكمواطن حابب يحلم شوي حابب احكي للحكومة الرشيدة شو حلمت ؛
بحلم ان الاردن صار فيها بنية تحتية محترمة ولما تشتي الدنيا ما يغرق وسط البلد او تسكر الانفاق ..
بحلم ان المدارس الحكومية صارت زي المدارس الخاصة من مباني ومناهج ومعلمين "رواتبهم منيحة وبدرسو ولادنا بقلب ورب "
بحلم يصير عنا تأمين صحي للغير مؤمنين ويبطل المريض يستنى شهور عشان صورة او موعد وما يموت قبل ما يوصلو الدور ، او يضل يدور على نائب عشان يعطيه اعفاء .
بحلم اطلع من البيت والاقي مواصلات ما اتبهدل فيها واوصل دوامي بالوقت ( وحلمت ان الباص السريع مش عاجبني لانو حلمي القديم كان اشي غير ،بس طلع باص مؤسسة لما صحيت)
بحلم يتثبت عمال المياومة بحلم انو ابوي المتقاعد يجيه زيادة على راتبه اعلى من ٧٠ قرش
بحلم يصير رواتب هالناس تكفيهم لاخر الشهر .. بحلم تكون الخدمات بالمحافظات زي عمان
بحلم الاقي مقابل ملموس للضريبة اللي بدفعها بحلم هالمشروع يصير حقيقة ونستفيد منو "كشعب" مش شعوب دول ثانية..
النومة طويلة والاحلام ما بتخلص.
انا صحيت على الدوام وصاحبي العاطل عن العمل ضل يحلم بلكي بالحلم لقى شغل …
في بلادي "احلامنا" كوابيس للحكومة ..
في بلادي لا نملك سوى الحلم ..
هي احلام لعلها تتحقق ..
